कल्याण पूर्वेतील कोळसेवाडी पोलीस ठाणे हद्दीत असलेल्या नाना पावशे चौकातील एका इमारतीत राहणार्‍या पोलीस हवालदार कुटुंबाचा घरगुती वाद इतका विकोपाला गेला की या वादातून पत्नीने पोलिसात नोकरीवर असलेल्या पतीच्या डोक्यावर जबर मारहाण केल्याने त्याचा मृत्यू झाला. या मारहाणीत मृत इसमाची मुलगीही सहभागी असल्याचे निष्पन्न झाल्याने कोळसेवाडी पोलीस ठाण्यात पत्नी आणि मुलगी या दोघांविरोधात खुनाचा गुन्हा दाखल करण्यात आला आहे.
पोलीस सुत्रांकडून मिळालेल्या माहितीनुसार नाना पावशे चौकातील हिरा पन्ना अपार्टमेंटच्या तिसर्‍या मजल्यावरील रूम नं. १५ मध्ये राहणार्‍या बोरसे कुटुंबामध्ये ६ जानेवारीच्या रात्री ९ च्या सुमारास कौटुंबिक वाद झाला. या वादाचे पर्यावसान हाणामारीत झाले. विकोपाला गेलेल्या या हाणामारीत मृत प्रकाश राजाराम बोरसे (५५) यांची पत्नी ज्योती प्रकाश बोरसे (४५) आणि मुलगी भाग्यश्री प्रकाश बोरसे (२७) या दोघींनी प्रकाश बोरसे यांच्या कपाळावर, तोंडावर कोणत्यातरी जड वस्तूने मारहाण केली. या मारहाणीत जबरी जखमी झालेले प्रकाश बोरसे यांना औषधोपचारासाठी रुग्णालयात नेले असता औषधोपचार सुरू होण्यापूर्वीच प्रकाश बोरसे यांचा मृत्यू झाल्याचे डॉक्टरांनी सांगितले.
या मारहाणीत प्रकाश बोरसे यांचा खून केल्याप्रकरणी पत्नी ज्योती आणि मुलगी भाग्यश्री यांच्या विरोधात कोळसेवाडी पोलीस ठाण्यात गुन्हा दाखल करण्यात आला. वरिष्ठ पोलीस निरीक्षक बशीर शेख यांचे मार्गदर्शनाखाली पोलीस निरीक्षक सी. एम.कदम अधिक तपास करीत आहेत. मृत प्रकाश बोरसे हे कुर्ला येथील पोलीस ठाण्यात पोलीस हवालदार या पदावर कार्यरत होते.
