भारतातील कोरोना विषाणूचा कहर कायम आहे. यामुळे भारतातील कोरोनाबाधितांच्या संख्येने १५ लाखांचा टप्पा पार केला आहे. ताज्या आकडेवारीनुसार देशात आतापर्यंत १५ लाख ९८८ जण कोरोनाबाधित झाले आहेत. यापैकी आतापर्यंत ९ लाख ६१ हजार २१५ रुग्ण कोरोनामुक्त झाले असून ३३ हजार ६२० रुग्णांचा मृत्यू झाला आहे. तसेच सध्या ५ लाख ६ हजार १५३ जणांवर उपचार सुरू आहेत.
देशात महाराष्ट्र आणि तामिळनाडू राज्यात कोरोनाबाधितांची रुग्णांची संख्या सर्वाधिक आहे. महाराष्ट्रातील कोरोनाबाधितांची संख्या ३ लाखांहून अधिक आहे. आज तामिळनाडूत ६ हजार ९७२ कोरोनाबाधित नवे रुग्ण आढळले असून ८८ रुग्णांच्या मृत्यूची नोंद झाली आहे. त्यामुळे तामिळनाडूतील कोरोनाबाधितांची संख्या २ लाख २७ हजार ६८८वर पोहोचली आहे. राजधानी चेन्नईत आज १ हजार १०७ कोरोनाबाधित नवे रुग्ण आढळले असून येथील कोरोनाबाधितांची संख्या ९६ हजार ४३८वर पोहोचली आहे.
सध्या तामिळनाडूत ५७ हजार ७३ रुग्णांवर उपचार सुरू असून १ लाख ६६ हजार ९५६ रुग्ण कोरोनामुक्त झाले आहे. आतापर्यंत तामिळनाडूत ३ हजार ६५९ रुग्णांचा मृत्यू झाला आहे. दरम्यान केरळमध्ये आज १ हजार १६७ नवे कोरोनाबाधित रुग्ण आढळले असून ४ जणांचा मृत्यू झाला आहे. दिल्लीत गेल्या २४ तासांत १ हजार ५६ कोरोनाबाधित नवे रुग्ण आढळले असून दिल्ली बाधितांची संख्या १ लाख ३२ हजार २७५वर पोहोचली आहे.
हेही वाचा – ४७ चीनी Appsवरील बंदीमुळे ड्रॅगन भडकला; म्हणाला, भारताने चूक सुधारली पाहिजे
