मुंबईः उपमुख्यमंत्री देवेंद्र फडणवीस यांची पत्नी अमृता फडणवीस यांच्याकडे खंडणी मागितल्याची ध्वनीचित्रफीत पंतप्रधान नरेंद्र मोदी, राष्ट्रवादी कॉंग्रेस पक्षाचे अध्यक्ष शरद पवार व माजी मुख्यमंत्री उद्धव ठाकरे यांना पाठवण्याची धमकी आरोपी अनिक्षा जयसिंघानी दिली होती. फडणवीस यांची कारकीर्द संपवण्याचा इशारा जयसिंघानी यांनी दिला होता. हा पुरावा मलबार हिल पोलिसांनी आरोपत्रात जोडला आहे.
जयसिंघानीने अमृता फडणवीस यांच्याकडे मागितलेल्या खंडणीचे आरोपपत्र गेल्या महिन्यात मलबार हिल पोलिसांनी दाखल केले. ७३३ पानी या आरोपपत्रात १३ साक्षीदारांची साक्ष आहेत. अनिल व अनिक्षा जयसिंघानी आणि अमृता फडणवीस यांच्यात झालेल्या संभाषणाचा तपशील आरोपपत्रात आहे. अनिक्षाने अमृता फडवणवीस यांना पाठवलेले धमकीचे संदेशही आरोपपत्रात आहेत. अमृता फडणवीस यांनी अनिक्षाच्या धमक्यांमुळे तिचा फोन घेणे बंद केले होते. तिचा मोबाईलही ब्लॉक केला होता. मोबाईल ब्लॉक केल्यामुळे तिचे वडील अनिल जयसिंघानी रागावले आहेत. ते तुम्हाला व तुमच्या कुटुंबियांना हानी पोहोचवतील असा धमकीचा मेसेज अनिक्षाने अमृता यांना पाठवला होता. हा मेसेज आरोपपत्रात जोडण्यात आला आहे. हा मोठा राजकीय मुद्दा करुन फडणवीस यांना लक्ष केलं जाईल. त्यांच उपमुख्यमंत्रीपद जाऊ शकतं. त्यांची राजकीय कारकीर्द संपू शकते, असा इशारा अनिक्षाने अमृता फडणवीस यांना दिला होता, असेही आरोपपत्रात नमूद करण्यात आले आहे.