सार्वजनिक बांधकाम विभागाचे तत्कालीन अधीक्षक अभियंता नाना पवार यांच्या चौकशीची फाईल माजी मंत्री चंद्रकांत पाटील यांच्या कार्यकाळातच तयार झाली होती.ती फाईल जशीच्या तशी मी मुख्यमंत्री उद्धव ठाकरे यांच्याकडे निर्णयासाठी पाठवली. ती फाईल परत आली तेव्हा त्‍यावर नाना पवार यांचे नाव वगळून चौकशी करावी, असे म्‍हटले होते.मात्र मुख्यमंत्र्यांची सही आणि शेरा याबाबत आपणास शंका आल्‍याने आपण माहिती घेतली तेव्हा मुख्यमंत्र्यांनी आपण तसा शेरा मारलेलाच नसल्‍याचे स्‍पष्‍ट केले. आपल्‍या परवानगी शिवायच हा प्रकार झाल्‍याचे त्‍यांनी आपणास सांगितले.या प्रकरणी मुख्यमंत्र्यांनी एफआयआर दाखल करण्याचे आणि चौकशी करण्याचे आदेश दिले असल्‍याची माहिती सार्वजनिक बांधकाम मंत्री अशोक चव्हाण यांनी सोमवारी विधानसभेत दिली.
राज्‍य सरकारच्या विविध योजनांवर मोठे अधिकारी काम करत असतात.काम करणा-या प्रत्‍येक अधिका-याच्या मागे जर चौकशीचे शुक्‍लकाष्‍ठ लागले तर कामेच होणार नाहीत, असेही चव्हाण म्‍हणाले.
आज विधानसभेट सार्वजनिक बांधकाम विभागाच्या अर्थसंकल्‍पीय अनुदान मागण्या मंजूर करण्यात आल्या. तत्पूर्वी झालेल्या चर्चेला उत्तर देताना अशोक चव्हाण यांनी भाजपच्या प्रशांत बंब यांनी उपस्थित केलेल्या प्रश्नांना उत्तरे दिली.
प्रशांत बंब यांनी आपल्‍या विभागाकडे ३० तक्रारी केल्‍या आहेत.त्‍यांच्या प्रत्‍येक तक्रारीची दखल आपल्‍या विभागाने घेतली आहे.त्‍यातील काही प्रकरणात शिस्‍तभंग आणि दोषारोपपत्र दाखल करण्यापर्यंतचीही कारवाई झाली आहे.त्‍यांच्या कुठल्‍याही तक्रारीची दखल घेतली नाही असे नाही.मात्र अनेक अधिकारी हे उत्‍तमरित्‍या कार्य करत असतात.सगळयांच्या मागे जर चौकशा लावल्‍या तर कामेच होणार नाहीत, असे चव्हाण म्‍हणाले.
प्रशांत बंब हे स्‍वतः जाऊन रस्‍त्‍यांना उकरून पाहत असतात.तसे करण्यापेक्षा त्‍यांनी विभागाकडे तक्रार करावी.विभागाकडे त्‍यासाठी व्हिजिलन्स आणि क्‍वालिटी कंट्रोल यंत्रणा आहे ती ते काम करेल, असा सल्ला अशोक चव्हाण यांनी दिला.
अधिकाऱ्यांच्या बदल्‍या किंवा पदोन्नत्‍यांमध्ये कोणताही भ्रष्‍टाचार होण्याचे कारणच नाही.कारण या दोन्हीची यादी शासकीय वेबसाईटवर प्रकाशित करण्यात येते.पदोन्नतीसाठी सेवाज्‍येष्‍ठता कधीही डावलण्यात आली नसल्‍याचेही अशोक चव्हाण यांनी सांगितले.
हेही वाचा – शिवाजी महाराजांच्या जयंतीचा वाद नको; उपमुख्यमंत्री अजित पवार यांनी भाजपला सुनावले
