Thursday, February 18, 2021
27 C
Mumbai
घर ताज्या घडामोडी Corona Update : अकोला, यवतमाळ, अमरावतीत Lockdown ची नामुष्की

Corona Update : अकोला, यवतमाळ, अमरावतीत Lockdown ची नामुष्की

Related Story

- Advertisement -

महाराष्ट्रात कोरोनाच्या रूग्णांची वाढती संख्या पाहता, पुन्हा एकदा लॉकडाऊन करण्याची वेळ अकोला, यवतमाळ आणि अमरावतीमध्ये आली आहे. केवळ अत्यावश्यक सेवा या कालावधीत सुरू राहतील. या दोन्ही ठिकाणी कोरोनाची वाढती रूग्णसंख्या पाहता जिल्हा प्रशासनाकडून हा निर्णय घेण्यात आला आहे. अमरावतीत दर रविवारी जिल्हा बंद ठेवण्यात येईल. यादिवशी फक्त अत्यावश्यक सेवा सुरू राहणार असल्याची माहिती अमरावतीचे जिल्हाधिकारी शैलेश नवाल यांनी दिली आहे. येत्या रविवारपासून अमरावती जिल्ह्यात लॉकडाऊनची घोषणा झाली आहे. अमरावतीमध्ये दर आठवड्यात शनिवारी रात्री ८ ते सोमवारी सकाळी ८ पर्यंत लॉकडाऊन जाहीर करण्यात आला आहे. येत्या १९ फेब्रुवारीपासूनच शहरातील आणि जिल्ह्यातील सर्व आस्थापना बंद राहणार आहेत.

धार्मिक समारंभासाठी केवळ ५ व्यक्तींची परवानगी असेल. तर कोरोनाशी संबंधीत नियमावलीचे पालन न करणाऱ्यांवर कठोर निर्णय घेण्यात येईल. प्रत्येक आठवड्यात शनिवारी ते सोमवार असा लॉकडाऊन लागू असेल असे यावेळी जिल्ह्याधिकाऱ्यांनी स्पष्ट केले. जलतरण तलाव, इनडोअर गेम्स यासारख्या गोष्टींवर पुर्णपणे बंदी असेल. तर धार्मिक समारंभावरही यामुळे मर्यादा आलेल्या आहेत. गेल्या चार दिवसांपासून अमरावतीत कोरोना रूग्णांच्या आकडेवारीत सातत्याने वाढ होत आहे. दरम्यानच्या कालावधीत १४ फेब्रुवारीला ४३५ रूग्ण सापडले आहेत. यादरम्यान १२ जणांचा मृत्यू झाला आहे. याआधीच राज्याचे उपमुख्यमंत्री यांनी कोरोना रूग्णांची संख्या पाहता लॉकडाऊनची घोषणा करावी लागेल असा इशारा दिला होता. त्यानुसारच जिल्हा प्रशासनाने पावले उचलत या एका दिवसाच्या लॉकडाऊनची घोषणा केली आहे. अकोला, अमरावती आणि यवतमाळमध्ये लॉकडाऊन करण्याचे अधिकार हे स्थानिक प्रशासनाला देण्यात आले आहे. मुख्यमंत्र्यांच्या बैठकीत हे आदेश जिल्ह्याधिकाऱ्यांना याआधीच देण्यात आले होते. या तिन्ही परिसरात तीन ते चार महिन्यानंतर कोरोनाने पुन्हा एकदा डोक वर काढले आहे. त्यामुळेच या जिल्ह्यांमध्ये लॉकडाऊनची घोषणा करण्याचा निर्णय शासनामार्फत घेण्यात आला आहे.

- Advertisement -

राज्यातील अमरावती, यवतमाळ, अकोला या जिल्ह्यांमध्ये कोरोना रुग्ण मोठ्या प्रमाणात आढळून येत आहेत. या जिल्ह्यातील ज्या भागात रुग्ण संख्या जास्त आढळून येत आहे तेथे कंटेनमेंट झोन जाहीर करुन तातडीने प्रतिबंधात्मक उपाययोजना करण्याचे निर्देश मुख्य सचिव संजय कुमार यांनी आज या तीन जिल्ह्यांच्या जिल्हाधिकाऱ्यांना दिले.

राज्यात कोरोनाचा प्रादुर्भाव वाढल्याच्या पार्श्वभुमीवर मुख्यमंत्री उद्धव ठाकरे, उपमुख्यमंत्री अजित पवार आणि आरोग्य मंत्री राजेश टोपे यांनी नुकतीच सर्व विभागीय आयुक्त, जिल्हाधिकारी, महापालिका आयुक्त, पोलीस प्रशासन यांची आढावा बैठक घेतली होती. या बैठकीत घेण्यात आलेल्या विविध निर्णय तसेच उपाययोजनांबाबत सर्व जिल्हाधिकाऱ्यांना आरोग्य विभागाचे प्रधान सचिव डॉ.प्रदिप व्यास यांनी पत्राद्वारे कळविले आहे.

हे भाग होणार कंटेनमेंट झोन

- Advertisement -

अमरावती जिल्ह्यातील अचलपुर तालुका, अमरावती महापालिका क्षेत्र, यवतमाळ जिल्ह्यातील यवतमाळ, पुसद आणि पांढरकवढा नगरपरिषद क्षेत्र आणि अकोला जिल्ह्यातील अकोट व मुर्तीजापूर तालुका आणि अकोला महापालिका क्षेत्र या भागामध्ये कोरोनाचे रुग्ण सर्वाधिक आढळून येत आहेत. या भागातील संसर्ग रोखण्यासाठी जिल्हाधिकाऱ्यांनी हे सर्व क्षेत्र कंटेनमेंट झोन म्हणून जाहीर करुन प्रतिबंधात्मक उपाययोजना करण्याचे मुख्य सचिवांनी निर्देश दिले आहेत.

अकोला जिल्ह्याचा कोरोना रुग्ण संख्येचा दैनंदिन पॉझिटिव्हिटि दर हा 32 टक्के असून आठवड्याचा पॉझिटिव्हिटि दर 24 टक्के आहे. अमरावती जिल्ह्याचा दैनंदिन पॉझिटिव्हिटि दर 48 टक्के असून आठवड्याचा 35 टक्के आहे तर यवतमाळ जिल्ह्याचा दैनंदिन आणि आठवड्याचा पॉझिटिव्हिटि दर 15 टक्के आहे. संपूर्ण राज्याचा दैनंदिन पॉझिटिव्हिटि दर हा 8.8 टक्के असून आठवड्याचा पॉझिटिव्हिटि दर 7.76 टक्के एवढा आहे.

कोरोना चाचण्या वाढणार

सर्वाधिक प्रादुर्भाव असलेल्या जिल्ह्यांमध्ये कॉन्टॅक्ट ट्रेसिंगचे प्रमाण वाढवावे. एका रुग्णामागे किमान 20 ते 30 निकट सहवासितांची तपासणी करुन चाचण्यांचे प्रमाण वाढवावे आणि पॉझिटिव्हिटि दर 10 टक्क्यांपेक्षा खाली आणावा असे निर्देश आरोग्य विभागाच्या प्रधान सचिवांनी सर्व जिल्हाधिकारी आणि महापालिका आयुक्तांना दिले आहेत. ज्या भागात नवीन रुग्ण आढळून येत आहेत त्यांच्या 20 पट अधिक चाचण्यांची संख्या वाढविण्याचे तसेच लक्षणे असलेल्या रुग्णांची आरटीपीसीआर चाचणी करण्याची सूचना देण्यात आली आहे. ज्या ठिकाणी सिटीस्कॅन चाचणी केली जाते तेथे कोरोनाचा संशयित रुग्ण आढळल्यास त्याबाबत जिल्हा प्रशासनाला माहिती कळविणे बंधनकारक करण्यात आले आहे.


 

- Advertisement -