मुंबईत तीन हजार युनिट रक्त साठा; रक्तदानासाठी पुढे येण्याचे राज्य रक्त संक्रमण परिषदेचे आवाहन

मुंबईमध्ये तीन हजार युनिट इतकाच रक्त साठा असून, हा रक्तसाठा किमान आठवडाभर पुरेल इतकाच आहे.

blood donation needed as only Three thousand units of blood stock in Mumbai
मुंबईत तीन हजार युनिट रक्त साठा

कोरोनाच्या पार्श्वभूमीवर राज्यात रक्ताचा तुटवडा जाणवत असल्याने राज्य रक्त संक्रमण परिषदेकडून सामाजिक संस्था, मंडळांना रक्तदान शिबिराचे आयोजन करण्याचे आवाहन करत आहे. सध्या मुंबईमध्ये रक्ताचा तुटवडा जाणवत असून, मुंबईमध्ये तीन हजार युनिट इतकाच रक्त साठा असून, हा रक्तसाठा किमान आठवडाभर पुरेल इतकाच आहे. त्यामुळे रक्ताच्या संभाव्य तुटवड्यावर मात करण्यासाठी परिषदेकडून विविध उपाययोजना आखण्यात येत असून, सर्व खासगी रक्तपेढ्यांनाही रक्तदान शिबिराचे आयोजन करण्याचे आदेश देण्यात आले आहेत.

कोरोनाच्या पार्श्वभूमीवर सध्या शाळा, महाविद्यालये बंद असून खासगी कार्यालये, बड्या कॉर्पोरेट कंपन्यांमध्ये वर्कफॉर्म होम सुरु आहे. त्यामुळे मुंबई शहर व उपनगरात सध्या रक्तदान शिबिर मोजक्याच ठिकाणी होत आहे. परिणामी, मुंबईसह राज्यात रक्ताचा तुटवडा जाणवत आहे. सध्या गरजेपेक्षा कमी म्हणजे ५० टक्के रक्तदान होत आहे. मुबंईमध्ये सध्या तीन हजार युनिट रक्तसाठा उपलब्ध असून, दररोज किमान ५०० ते ८०० युनिट रक्ताची गरज लागत आहे. त्यामुळे उपलब्ध रक्तसाठा हा किमान आठवडाभर पुरेल इतकाच आहे.

मुंबईसह राज्यातील संभाव्य रक्त तुटवड्यावर मात करण्यासाठी सर्व रक्तपेढ्यांना सामाजिक, राजकीय, धार्मिक संस्थांशी संपर्क करून कोरोनाच्या नियमांचे पालन करत रक्तदान शिबिराचे आयोजन करण्याच्या सूचना परिषदेकडून देण्यात आले आहेत. तसेच धार्मिक संस्था, गृहनिर्माण सोसायट्या, बैठ्या चाळीतील रहिवाशांना रक्तदान शिबीरांचे आयोजन करण्याबाबत सूचना केल्या आहेत. याशिवाय रक्तसंकलन वाहन पाठवून रक्त संकलन करण्यावर भर देण्यात यावा. तर राज्यात रक्ताचा तुटवडा भासणार नाही याची खबरदारी सर्व रक्तपेढ्यांनी घ्यावी असे आदेश राज्य रक्त संक्रमण परिषदेकडून देण्यात आले आहेत.

रक्तदानासाठी सर्वसामान्य नागरिकांनी पुढे यावे, असे आवाहन परिषदेकडून करण्यात आले आहे. मुंबईत तीन हजार युनिट रक्तसाठा असून हा रक्तसाठा कमी आहे. संभाव्य रक्त तुटवड्याकरीता राज्यातील सर्व खासगी रक्तपेढ्यांनी रक्तदान शिबिरे घेण्यात यावे, असे आदेश दिले आहेत. विविध माध्यमातून रक्तदानासाठी मुंबईकरांनी पुढे यावे.
-डॉ. अरुण थोरात, सहसंचालक, राज्य रक्त संक्रमण परिषद