घरठाणेजिवंत शिक्षकाचा मृत्यूचा दाखला...ठाण्यातील धक्कादायक प्रकार

जिवंत शिक्षकाचा मृत्यूचा दाखला…ठाण्यातील धक्कादायक प्रकार

Subscribe

महापालिकेच्या कारभाराबाबत ऐकावे तेवढे थोडेच आहे. त्यातच बेकायदेशीर अभिनेत्रीला लस दिल्याचा प्रकार असो.. किंवा एकाच महिलेला १५ मिनिटांत कोरोना लस देताना तीन वेळा सुई टोचल्याचा प्रकार असो.. त्या पाठोपाठ आणखी एक धक्कादायक प्रकार समोर आला. ठाणेकर असलेले चंद्रशेखर देसाई नामक शिक्षकाला चक्क त्यांच्याच मृत्यूचा दाखला तयार असल्याचा एक फोन ठाणे महापालिकेतून आला आहे. या फोनमुळे देसाई कुटुंबाला नाहक मनस्तापाला तोंड द्यावे लागत आहे.

घोडबंदर रोडवरील मानपाडा येथे राहणारे चंद्रशेखर देसाई (५५) हे गेल्या २० वर्षांपासून ठाण्यात वास्तव्यास असून ते मुंबईतील घाटकोपर येथील शाळेत शिक्षक आहेत. ८० वर्षीय आई, पत्नी आणि तीन मुलांसह ते ठाण्यात राहत असताना ऑगस्ट २०२० मध्ये ते कोरोना पॉझिटिव्ह झाले. मात्र लक्षणे गंभीर नसल्याने आणि त्यांच्या मित्राची खोली रिकामी असल्याने डॉक्टरांच्या सल्ल्यानुसार ते होमक्वारंटाईन झाले. शासनाच्या नियमावली नुसार ते १४ दिवस होमक्वारंटाईन होते. त्यानंतर सर्व काही व्यवस्थित सुरू असताना, ते मंगळवारी शाळेत महत्वाचे काम करत असताना अचानक दुपारी साडेबाराच्या सुमारास एक फोन आला. फोन उचलताच समोरून त्यांना एका महिलेने आपण ठाणे महापालिकेतून बोलत असल्याचे सांगितले. तसेच त्यांचे नाव व राहत असलेला पत्ता सांगून त्या महिलेने पहिली खातरजमा केली. तसेच त्यांना त्यांच्या मृत्यूचा दाखला तयार असल्याचे सांगण्यात आले. त्यावेळी त्यांना काही क्षणासाठी धक्का बसला. पण, त्यातून ते सावरून मॅडम मी जीवंत आहे. मीच आपल्याशी बोलत आहे असे कथन केले. तेवढ्यात फोन ठेवण्यात आला.

- Advertisement -

देसाई हे काम संपल्यावर थेट ठाणे महापालिकेत येत कोविड सेंटर रूम मध्ये गेले. त्यांनी आलेल्या फोन बाबत संबंधित विभागाच्या एका वरिष्ठ महिला अधिकाऱ्यांना माहिती दिली. तसेच आपण जीवंत असल्याचे सांगितले. तेव्हा त्या वरिष्ठ अधिकारी महिलेने आम्हा आयसीएमआर मार्फत आलेल्या यादीत ज्याप्रमाणे म्हटले आहे, त्याप्रमाणे आपणास फोन करण्यात आला आहे. तसेच त्या अधिकारी महिलेने देसाई यांना त्यांच्या मृत्यूच्या दाखल्याची प्रिंट ही काढून दाखवली. त्यावेळी त्यांना धक्काच बसला. यासंदर्भात महापालिका उपायुक्त संदीप माळवी यांच्याशी संपर्क साधला असता, तो होऊ शकला नाही.

मृत्यूची तारीख २२ एप्रिल २०२१

देसाई यांना दाखवलेल्या प्रिंटवर त्यांचा मृत्यू २२ एप्रिल २०२१ रोजी म्हणजे ते पॉझिटिव्ह झाल्यानंतर १० महिन्यांनी झाल्याचे म्हटले आहे. तसेच त्यांचा मृत्यु हा होमक्वारंटाईन असताना उपचार घेताना मृत्यू झाल्याचे स्पष्ट नोंद असल्याचे देसाई यांच्या निर्दशनास आले आहे. तसेच अधिकारी महिलेने यामध्ये आमची काही चूक नाही ज्याप्रमाणे यादी आली आहे. त्याप्रमाणे आपल्या मृत्यूचा दाखला तयार करण्यात आल्याचे म्हटले आहे.

- Advertisement -

घरी रडारड

देसाई हे घरी आल्यावर त्यांनी आलेल्या फोन बद्दल घरच्यांना सांगितले. त्यावेळी त्यांच्या बोलण्याकडे सर्वांचे कान टवकारले आणि त्यांच्या ८० वर्षीय आईपासून सर्वजण रडू लागले. कसेबसे समजू काढून त्यांना शांत केल्याचे त्यांनी बोलताना सांगितले.

“मी सरकारी सेवेत आहे. माझ्याबाबत असा प्रकार घडत असेल तर इतरांच्या बाबत विचारच न केलेला बरा. ज्यावेळी फोन आला त्यावेळी नशीब फोन माझ्याजवळ होता. समजा फोन घरी राहिला असता, आणि तो फोन आई किंवा पत्नी तथा मुलांनी घेतला असता तर काय अनर्थ घडले असते. याचा विचारच करवत नाही. असे प्रकार इतरांच्या बाबतीत घडू नये म्हणून धाडस करून समोर आलो आहे.” – चंद्रशेखर देसाई, शिक्षक

 

- Advertisment -
- Advertisment -
- Advertisment -