‘दुबई’च्या छताची जोरदार चर्चा
या नव्या पुलासाठी सुमारे ६ कोटी रुपये खर्च करण्यात आले असून, पुलाचं छत खास दुबईवरुन मागवण्यात आलं आहे. दुबईचं छत बसवण्यात आल्यामुळे हा पूल सध्या चर्चेचा विषय ठरतो आहे. अशाप्रकारे छत बनवण्याचं काम इंडालगो नावाची एक भारतीय कंपनीही करते. मात्र, पुलासाठी कमी वजनाच्या आणि अधिक भक्कम छताची गरज होती. तसंच हे काम लवकर पूर्ण होणंही अपेक्षित होतं. त्यामुळे हे छत दुबईवरुन आणण्यात आल्याची माहिती, श्चिम रेल्वेच्या वरिष्ठ अधिकाऱ्यांनी दिली. दुबई येथून आणलेलं छत वजनाने हलकं असून, त्याची टिकाउ क्षमता अधिक असल्याचंही, त्यांनी सांगितलं.
अखेर प्रतीक्षा संपली
एलफिन्स्टन स्थानकावरील नव्या पुलाला रेल्वे प्रशासनाने सप्टेंबर २०१६ मध्ये मंजुरी दिली होती. परंतु या पुलासाठी निविदा मागवण्यास पश्चिम रेल्वे प्रशासनाने खूप विलंब केला. तब्बल एका वर्षानंतर रेल्वेने पुलासाठी निविदा मागवल्या. २९ सप्टेंबर २०१७ रोजी येथील जून्या पुलावर प्रवाशांची चेंगराचेंगरी झाली होती. त्यामध्ये २३ प्रवाशांना आपला जीव गमवावा लागला होता. नवा पूल वेळेत उभारला असता तर ही दुर्घटना टळली असती. त्यामुळे नागरिकांनी रेल्वे प्रशासनाविरोधात संताप व्यक्त केला. दुर्घटनेमुळे जागे झालेल्या प्रशासनाने निविदा प्रक्रिया पूर्ण करुन ७ नोव्हेंबर २०१७ रोजी पुलाचे काम सुरु केले. ८ महिन्यानंतर नव्या पुलाचे काम पूर्ण झाले असून आता हा पूल प्रवाशांसाठी खुला करण्यात येणार आहे.