मुंबई: सलमान खानच्या गॅलेक्सी अपार्टमेंटमध्ये झालेल्या गोळीबाराचा तपास पोलीस करत असताना, तुरुंगात बंद गँगस्टर लॉरेन्स बिश्नोईच्या भावाने या हल्ल्याची जबाबदारी स्वीकारली आहे. अनमोल बिश्नोईने रविवारी दुपारी सोशल मीडियावर पोस्ट करून पहाटे पाचच्या सुमारास अभिनेत्याच्या घराबाहेर झालेल्या गोळीबाराची जबाबदारी स्वीकारली आहे. एवढेच नाही तर अमेरिकेत असलेल्या अनमोलने सलमान खानला धमकीही दिली आहे. त्याने लिहिले आहे की, हा पहिला आणि शेवटचा इशारा होता, पुढच्या वेळी घरावर गोळी झाडणार नाही. (Salman Khan this is your last warning to you Dawood is your god Lawrence Bishnoi s brother Anmol Bishnoi takes responsibility)
रविवारी सकाळी बॉलीवूड अभिनेता सलमान खानच्या मुंबईतील घराबाहेर दोन अज्ञात मोटरसायकलस्वारांनी गोळीबार केला आणि तेथून पळ काढला. तेव्हापासून गॅलेक्सी अपार्टमेंटबाहेर पोलीस बंदोबस्त कडक करण्यात आला आहे. मुख्यमंत्री एकनाथ शिंदे यांनीही सलमानशी फोनवर चर्चा केली आहे. गुन्हे शाखा आणि पोलिसांचे फॉरेन्सिक पथक तपासात गुंतले असून, सीसीटीव्ही फुटेज स्कॅन करत आहेत.
अनमोल बिश्नोईची धमकी – हा फक्त ट्रेलर होता
अनमोल बिश्नोईने फेसबुकवर एक पोस्ट केली आहे. त्यात त्याने लिहिले आहे की, हा हल्ला केवळ ट्रेलर होता. पोस्टमध्ये लिहिले आहे की, ‘ओम जय श्री राम, जय गुरुजी जांभेश्वर, जय गुरु दयानंद सरस्वती, जय भारत. आम्हाला शांतता हवी आहे. दडपशाहीविरुद्धचा निर्णय युद्धातून घेतला जात असेल तर युद्ध योग्य आहे. सलमान खान आम्ही हे फक्त तुला ट्रेलर दाखवण्यासाठी केले आहे. आमच्या ताकदीची आणखी परीक्षा घेऊ नका. हा पहिला आणि शेवटचा इशारा आहे. यानंतर नुसत्या घरावर गोळ्या झाडल्या जाणार नाहीत.
पोस्टमध्ये लॉरेन्स बिश्नोई, गोल्डी ब्रार यांची नावं
अनमोल बिश्नोईने आपल्या पोस्टमध्ये पुढे लिहिले की, ‘तुम्ही दाऊद इब्राहिम आणि छोटा शकीलला देव मानले आहे. त्याच्या नावावर आम्ही दोन कुत्रे पाळले आहेत, पण त्यांच्याबद्दल फारसे बोलायची सवय नाही.
गेल्या वर्षीच आला होता धमकीचा ईमेल
ईदच्या दोन दिवसांनी सलमानच्या घरावर झालेल्या गोळीबाराने सलमानच्या चाहत्यांची चिंता वाढवली आहे. यासोबतच अभिनेत्याच्या सुरक्षेवरही प्रश्न उपस्थित होत आहेत. तर सरकारने सलमान खानला वाय प्लस सुरक्षा दिली आहे. मात्र, सलमान खानला जीवे मारण्याच्या धमक्या येण्याची ही पहिलीच वेळ नाही. याआधी गेल्या वर्षी मार्चमध्ये सलमानच्या ऑफिसमध्ये एक ईमेल आला होता, ज्यामध्ये त्याला जीवे मारण्याची धमकी देण्यात आली होती.
लॉरेन्स बिश्नोई म्हणाला होता- मी सलमानला मारणार. त्यानंतरही पोलिसांनी या प्रकरणी गँगस्टर लॉरेन्स बिश्नोई, गोल्डी ब्रार आणि अन्य एकावर एफआयआर नोंदवला होता. लॉरेन्स बिश्नोई याने वृत्तवाहिनीला दिलेली मुलाखत सलमानने पाहिली असेल, नसेल तर ती पाहावी, असे ईमेलमध्ये म्हटले आहे. जर खानला हे प्रकरण (ब्लॅक बक केस-चिंकारा) बंद करायचे असेल तर त्यांनी गोल्डीभाईशी समोरासमोर बोलावे.
लॉरेन्स बिश्नोईने मुलाखतीत सलमान खानला मारणार असल्याचे उघडपणे सांगितले होते. याशिवाय सलमानचे वडील सलीम खान यांनाही धमकीचे पत्र मिळाले आहे. त्यानंतरच अभिनेत्याला वाय प्लस सुरक्षा देण्यात आली.
(हेही वाचा: Salman Khan : ट्रिपल इंजिन खोके सरकारचा क्राइमला आशीर्वाद, सुप्रिया सुळेचा हल्लाबोल)
