मुंबई पालिकेच्या राजावाडी रुग्णालयातील आयसीयू विभागात बेशुद्ध अवस्थेत उपचार घेणाऱ्या एक रुग्णाच्या डोळ्याचा भाग उंदराने कुरतडल्याची घटना मंगळवारी उजेडात आली. अपेक्षेप्रमाणे या घटनेचे तीव्र पडसाद बुधवारी स्थायी समितीच्या बैठकीत उमटले. यावेळी, कंत्राटदाराने आयसीयूसमोर विभागाच्या नजीक भंगार सामान ठेवल्याने उंदरांचा वावर वाढल्याचे कारण समोर आले. मात्र स्थायी समिती अध्यक्ष यशवंत जाधव यांनी, पालिका प्रशासनाने या घटनेबाबत सविस्तर स्पष्टीकरण आगामी बैठकीत द्यावे, असे आदेश प्रशासनाला दिले.
तसेच, सर्वपक्षीय गटनेते, नगरसेवकांनी, प्रशासनाचा आणि आयसीयू विभाग खासगीरित्या चालविणाऱ्या खासगी कंत्राटदाराने जवळच जमा करून ठेवलेल्या भंगार सामानामुळे उंदरांचा वावर वाढून ही घटना घडली असून त्यास कंत्राटदाराचा आणि प्रशासनाचाही हलगर्जीपणा कारणीभूत असल्याचा आरोप करीत याप्रकरणी चौकशी करून कडक कारवाईची आणि ठोस उपाययोजना करण्याची मागणी केली. पालिका विरोधी पक्षनेते रवी राजा यांनी, पालिकेने ज्या संस्थांना खासगी रित्या आयसीयू विभागाची जबाबदारी दिली आहे, त्यांनीच या विभागाची देखभाल दुरुस्ती व सुरक्षितता पाहणे आणि रुग्णांची काळजी घेणे गरजेचे असल्याचे सांगत त्या कंत्राटदाराचा हलगर्जीपणा या घटनेला कारणीभूत असल्याचा आरोप केला.
त्या कंत्राटदाराने, राजावाडी रुग्णालयातील तळमजल्यावरील आयसीयू जवळील भागात भंगार जमा करून ठेवल्याने उंदरांचा वावर वाढला आणि त्यामधून ही घटना घडली असून त्यामुळे पालिकेचे नाव बदनाम होत असल्याचे सांगत रवी राजा यांनी, तीव्र नाराजी व्यक्त केली. तसेच, या घटनेला कारणीभूत ठरलेल्या खासगी कंत्राटदाराचे काम रद्द करण्याची मागणी रवी राजा यांनी केली.
असा घडला प्रकार
घाटकोपर (पूर्व) येथील पालिकेच्या राजावाडी रुग्णालयात आयसीयू कक्षात मेंदूज्वर व लिव्हर या आजाराने त्रस्त श्रीनिवास यल्लपा (२४) हा तरुण बेशुद्ध अवस्थेत आयसीयूमध्ये उपचार घेत असताना उंदराने त्याच्या डाव्या डोळ्याचा काही भाग कुरतडल्याची घटना मंगळवारी सकाळी उघडकीस आली. त्यामुळे खळबळ उडाली. या घटनेचे तीव्र पडसाद बुधवारच्या स्थायी समितीच्या बैठकीत उमटले. राष्ट्रवादी कॉंग्रेसच्या गटनेत्या राखी जाधव यांनी, सदर विषय उपस्थित करीत त्यास वाचा फोडली आणि पालिका प्रशासनाच्या आणि खासगी कंत्राटदाराच्या हलगर्जीपणाबाबत तीव्र नाराजी व्यक्त केली. तसेच, आयसीयू विभाग चालविणाऱ्या क्रीटीकेअर या कंत्राटदाराकडून आयसीयू विभाग पालिकेने आपल्या ताब्यात घेण्याची मागणी केल. भाजपचे भालचंद्र शिरसाट यांनी, या घटनेला सदर कंत्राटदार व पालिका दोघेही जबाबदार असल्याचा आरोप केला. तर, भाजपचे कमलेश यादव यांनी, पीडित रुग्णाला आर्थिक नुकसान भरपाई देण्याची मागणी केली.
राजावाडी रुग्णालयातील आयसीयू विभाग हा तळमजल्यावर असून हा विभाग क्रिटीकेअर या कंत्राटदाराला चालवण्यासाठी देण्यात आलेला आहे. मुंबईतील इतरही काही रुग्णालयातील अतिदक्षता विभाग कंत्राटदाराकडून चालवले जातात. राजावाडी येथील अतिदक्षता विभाग तळमजल्यावर असून बाजूला भंगार ठेवण्यात आले आहे. या सामानाची अडगळ असल्याने येथे उंदरांचा वावर सुरु असल्याचे समोर आले आहे. मात्र अतिदक्षता विभागासमोर भंगाराचे सामान पडलेले असताना प्रशासन काय करीत होते ? त्यांचे लक्ष नव्हते का? कंत्राटदाराला हे सामान हलवण्यासाठी का सांगण्यात आले नाही, असे प्रश्न बुधवारी स्थायी समितीतसर्वपक्षीय गटनेते, नगरसेवकांकडून उपस्थित करण्यात आले.
