बीड जिल्ह्यामध्ये एक लाजिरवाणी आणि तितकीच घृणास्पद घटना घडली आहे. बीड जिल्ह्यात राहणाऱ्या एका माणसाने त्याच्या पोटच्या पोरीसोबत असे काही केले, की ज्यामुळे कुणाचाही माणुसकीवरचा विश्वास उडून जाईल. या नराधम बापाने आपल्या १२ वर्षांच्या लहान मुलीवर बलात्कार केल्याची धक्कादायक घडना उघड झाली आहे. हे घृणास्पद कृत्य करणाऱ्या त्या आरोपी बापाविरोधात बीडच्या ग्रामीण पोलीस ठाण्यात लेखी गुन्हा नोंदवण्यात आला आहे. पोलिसांनी आरोपीला ताब्यात घेतले असून, त्याच्याविरोधात योग्य ती कारवाई केली जाणार असल्याची माहिती पोलिसांनी दिली आहे. दरम्यान, पीडित मुलीला सध्या नजीकच्या रुग्णालयात दाखल करण्यात आलं असल्याची माहिती मिळत आहे. प्राथमिक तपासानुसार, त्या नराधन बापाने दारूच्या नशेत हे कृत्यं केल्याचं समोर आलं आहे.
घटना सविस्तर…
उपलब्ध माहितीनुसार, या ३५ वर्षीय आरोपीला दारूचं जबरदस्त व्यसन असून, पत्नी आणि तीन मुलं असा त्याचा परिवार आहे. दोन वर्षांपूर्वी त्याची पत्नी आपल्या दोन मुली आणि एक मुलाला घेऊन घर सोडून निघून गेली होती. मात्र, आर्थिक चणचण भासत असल्यामुळे ती मुलांसह पुन्हा नवऱ्याकडे परतली. दरम्यान, दारू पिऊन नराधम पती पत्नीला आणि मुलांना रोज मारहाण करत असे. १२ वर्षीय पीडित मुलगी शिक्षणासोबत घरकामही करायची. मात्र, व्यसनी बाप तिला रोज रात्री मारहाण करायचा. तसंच तिला वारंवार जीवे मारण्याची धमकी देत तिच्यावर अत्याचारही करायचा. या गोष्टीबद्दल त्या मुलीने आपल्या चुलतीला सांगितलं. मात्र, त्याचा काहीच फायदा झाला नाही आणि बापाकडून तिच्यावर होणारा अत्याचार सुरूच राहिला. सोमवारी त्याने पुन्हा एकदा संधी साधून आपल्या पोटच्या पोरीवर बलात्कार केला. दरम्यान, आपल्यासोबत घडलेल्या या प्रकाराबाबत पीडितेने तिच्या भावंडांना सांगितले. घरकामासाठी बाहेर गेलेल्या आपल्या आईलाही याबाबत सांगायचं त्या तिघांनी ठरवलं. मात्र, त्यांनी कोणासमोर तोंड उघडू नये यासाठी नराधम बापाने तिघांनाही बेदम मारहाण केली.
हा प्रकार शेजाऱ्यांना समजताच संपूर्ण गावात त्याची बोंबाबोंब झाली. काही गावकऱ्यांनीच याबाबतची सगळी माहिती बीड ग्रामीण पोलिसांना दिली. गावकऱ्यांकडून घडलेला प्रकार समजून घेतल्यानंतर पोलिसांनी तातडीने आरोपीच्या घरी धाव घेतली आणि पीडितेसह अन्य दोन मुलांना त्या नराधमाच्या ताब्यातून सोडवले. तसंच आरोपीलाही तात्काळ आपल्या ताब्यात घेतलं. दरम्यान, पीडित मुलीने आणि तिच्या आईने आजवर त्यांना सहन कराव्या लागलेल्या त्रासाविषयी बीड पोलिसांना सविस्तर माहिती दिली आहे. तसंच आपला मानसिक आणि शारिरीक छळ करणाऱ्या त्या नराधम ‘पती’ आणि ‘पित्या’विरुद्ध लेखी तक्रारही नोंदवली आहे.
